Home விளையாட்டு இந்தியாவை வீழ்த்திய நம்பிக்கையுடன் நியூஸிலாந்தை எதிர்கொள்கிறது பாகிஸ்தான் !

இந்தியாவை வீழ்த்திய நம்பிக்கையுடன் நியூஸிலாந்தை எதிர்கொள்கிறது பாகிஸ்தான் !

90
0

இந்தியாவுக்கு எதிராக ஞாயிறன்ற வரலாற்று வெற்றியை ஈட்டிய பாகிஸ்தான், இன்று நடைபெறவுள்ள 2 ஆவது குழுவுக்கான இருபதுக்கு 20 உலகக் கிண்ண சுப்பர் 12 சுற்றில் நியூஸிலாந்தை ஷார்ஜாவில் எதிர்த்தாடவுள்ளது.

 

இப் போட்டி இன்று இரவு 7.30 மணிக்கு ஆரம்பமாகவுள்ளது.

 

இருவகை உலகக் கிண்ண கிரிக்கெட் போட்டிகளில் இந்தியாவுக்கு எதிராக தனது 13ஆவது முயற்சியில் முதல் தடவையாக வெற்றியீட்டிய பாகிஸ்தான், சுப்பர் 12 சுற்றில் இரண்டாவது வெற்றியைக் குறிவைத்து மிகுந்த நம்பிக்கையுடன் நியூஸிலாந்தை எதிர்கொள்ளவுள்ளது.

இந்தியாவின் வெற்றிக்குப் பின்னர், இது வெறும் ஆரம்பம் எனக் குறிப்பிட்ட பாகிஸ்தான் அணித் தலைவர்,

 

‘உலகக் கிண்ண கிரிக்கெட் போட்டியில் வெகுதூரம் செல்லவேண்டியுள்ளது. இந்தியாவை வெற்றி கொண்டோம் என்பதற்காக எல்லாம் இலகுவாக அமையும் எனக் கருதமுடியாது’ என்றார்.

 

இந்நிலையில் உலக கிரிக்கெட் அரங்கில் மற்றொரு பலம்வாய்ந்த அணியாக முன்னேறிவரும் நியூஸிலாந்துக்கு எதிரான இன்றைய போட்டி பாகிஸ்தானுக்கு சவால்மிக்கதாக அமையும் என எதிர்பார்க்கலாம்.

 

இந்த சுற்றுப் போட்டியில் முதல் தடவையாக களம் இறங்கும் நியூஸிலாந்து, தனது முயற்சியை சிறப்பாக ஆரம்பிக்கும் என எதிர்பார்க்கப்படுகின்றது.

 

கேன் வில்லியம்சன் தலைமையிலான நியூஸிலாந்து அணியில் முன்வரிசை மற்றும் மத்திய வரிசையில் பந்தை விளாசி அடிக்கக்கூடிய துடுப்பாட்ட வீரர்கள் இடம்பெறுகின்றனர்.

 

அதேபோன்று பந்தை ஸ்விங் செய்யக்கூடிய உயரமான வேகப்பந்துவீச்சாளர்களுடன் திறமையான சுழற்பந்துவீச்சாளர்களும் நியூஸிலாந்து அணியை சம பலம் கொண்டதாக எடுத்துக்காட்டுகின்றனர்.

 

ஆடவர்  இருபது – 20 அணிகளுக்கான தரவரிசையில் நியூஸிலாந்தும் பாகிஸ்தானும் முறையே 3 ஆம், 4 ஆம் இடங்களில் அடுத்தடுத்து இடம்பெறுகின்றன.

 

எனினும் இரண்டு அணிகளுக்கும் இடையில் நடைபெற்றுள்ள 20 சர்வதேச இருபதுக்கு 20 கிரிக்கெட் போட்டிகளில் பாகிஸ்தான் 14 – 10 என்ற ஆட்டக் கணக்கில் முன்னிலையில் இருக்கின்றது.

 

இருபது – 20 உலகக் கிண்ணத்திலும் பாகிஸ்தான் 3 – 2 என முன்னிலையில் இருக்கின்றது.

 

கடைசியாக 2 அணிகளும் 2020 இல் மோதிக்கொண்டபோது நியூஸிலாந்து வெற்றிபெற்றிருந்தது.

 

இருபதுக்கு 20 உலகக் கிண்ணப் போட்டிக்கு முன்பதாக பாகிஸ்தானுக்கு விஜயம் செய்திருந்த நியூஸிலாந்து, தொடர் ஆரம்பமாகவிருந்த நிலையில் பாதுகாப்பு காரணங்களைக் காட்டி தொடரை இரத்துச் செய்தமை பாகிஸ்தானுக்கு பெரும் ஏமாற்றத்தைக் கொடுத்தது.

 

ஒருவேளை அந்தத் தொடர் விளையாடப்பட்டிருந்தால் இந்த  2 அணிகளில் இப்போது யார் பலசாலி என்பது தெரியவந்திருக்கும்.

 

‘அந்தத் தொடர் இரத்துச்செய்யப்பட்டமை பெரும் ஏமாற்றத்தைக் கொடுத்தது. என்றாலும் பல வருடங்களாக எமது இரண்டு அணிகளுக்கும் இடையில் நல்லுறவு நிலவுகின்றது.

 

எமது அணிகள் நிறைய தடவைகள் ஒன்றையொன்று எதிர்த்தாடியுள்ளதுடன் இரண்டு அணிகளிலும் உள்ள பல வீரர்கள் எதிரும் புதிருமாக விளையாடியுள்ளோம். எனவே கிரிக்கெட் மகத்துவத்துக்கு உகந்தவகையில் இன்றைய போட்டி அமையும்’ என கேன் வில்லியம்சன் தெரிவித்தார்.

 

டுபாய் சர்வதேச அரங்கில் இந்தியாவுக்கு எதிராக பாகிஸ்தான் சகலதுறைகளிலும் அசாத்திய திறமைகளை  வெளிப்படுத்தியிருந்தது. பவர்ப்ளே மற்றும் கடைசிப் பகுதியில் அவ்வணியின் வேகப் பந்துவீச்சாளர்கள் ஆக்ரோஷமாக பந்துவீசி இந்தியாவை திணறச் செய்திருந்தனர்.

 

சுழல்பந்துவீச்சாளர்களும் மத்திய ஓவர்களில் திறமையாக செயற்பட்டிருந்தனர். ஆரம்ப வீரர்கள் (பாபர அஸாம், மொஹம்மத் ரிஸ்வான்) அதிரடிகளுடன் மிக நேர்த்தியாக துடுப்பெடுத்தாடியிருந்தனர்.

 

இதே திறமைகளை இன்றைய தினமும் பாகிஸ்தான் தொடர்ந்தால் நியூஸிலாந்து பெரும் நெருக்கடியை எதிர்கொள்ளும்.

 

மறுபுறத்தில், இருபதுக்கு 20 உலகக் கிண்ணம் ஆரம்பமாவதற்கு முன்னர் அவுஸ்திரேலியாவுடனும் இங்கிலாந்துடனும் விளையாடிய 2 பயிற்சிப் போட்டிகளிலும் நியூஸிலாந்து தோல்வி அடைந்திருந்தது.

 

ஆனால், ஆரம்ப வீரர் டிம் சிபேர்ட், மார்க் செப்மன் ஆகிய இருவரும் உபாதைக்குள்ளாகி இருக்கின்றமையே அணிக்கு பெரும் கவலையைக் கொடுத்துள்ளது.

 

அவுஸ்திரேலியாவுக்கு எதிரான பயிற்சிப் போட்டியில் முழங்கை உபாதையினால் சிரமப்பட்ட அணித் தலைவர் வில்லியம்சன், இங்கிலாந்துடனான போட்டியில் துடுப்பெடுத்தாடவில்லை. எனினும் சகலரும் இன்றைய போட்டிக்கு தயாராக இருப்பதாக வில்லியம்சன் குறிப்பிட்டார்.

 

பாகிஸ்தான் அணியில் மொஹம்மத் ஹவீஸ் (2,429 ஓட்டங்கள்), ஷொய்ப் மாலிக் (2,323), பாபர் அஸாம் (2,272), மோஹம்மத் ரிஸ்வான் (1,144), பக்கார் ஸமான் (1,021) ஆகியோர் துடுப்பாட்டத்திலும் ஹவீஸ் (97 விக்கெட்கள்), ஷதாப் கான் (59), ஹசன் அலி (54), இமாத் வசிம் (51), ஷஹீன் ஷா அப்றிடி (35) ஆகியோர் பந்துவீச்சிலும் திறமைசாலிகளாவர்.

நியூஸிலாந்து அணியில் மார்ட்டின் கப்டில் (2,939),  கேன் வில்லியம்சன் (1,805 ஓட்டங்கள்), டிம் சீபேர்ட் (695), டெவொன் பிலிப்ஸ் (585) ஆகியோர் துடுப்பாட்டத்திலும் 100 விக்கெட்களை நெருங்கும் டிம் சௌதி (99), இஷ் சோதி (73, மிச்செல் சென்ட்னர் (60) ஆகியோர் பந்துவீச்சிலும் முக்கிய வீரர்களாக இடமபெறுகின்றனர்.

இந்தத் திறமைகளின் அடிப்படையில் பாகிஸ்தான் சற்று பலம்வாய்ந்ததாகத் தென்படுகின்றது. மேலும் ஷார்ஜா விளையாட்டரங்கின் ஒரு பகுதியில் குறைதூர பவுண்ட்றி இருப்பதால் அதிரடி வீரர்கள் சாதிப்பார்கள் என எதிர்பார்க்கப்படுகின்றது. எவ்வாறாயினும் இன்றைய போட்டியில் எந்த அணி சகலதுறைகளிலும் பிரகாசிக்கின்றதோ அந்த அணிக்கே வெற்றி கிடைக்கும்.

அணிகள்

பாகிஸ்தான்: பாபர் அஸாம் (தலைவர்), மொஹம்மத் ரிஸ்வான், பக்கார் ஸமான், மொஹம்மத் ஹவீஸ், ஷொயெப் மாலிக், அசிப் அலி, இமாத் வசிம், ஷதாப் கான், ஹசன் அலி, ஷஹீன் ஷா அப்றிடி, ஹாரிஸ் ரவூப்.

நியூஸிலாந்து: மார்ட்டின் கப்டில், டிம் சீபேர்ட், கேன் வில்லியம்சன் (தலைவர), டெவொன் கொன்வே, க்ளென் பிலிப்ஸ், ஜிம்மி நீஷாம், மிச்செல் சென்ட்னர், கய்ல் ஜெமிசன், லொக்கி பேர்கசன், இஷ் சோதி, டிம் சௌதி.

LEAVE A REPLY

Please enter your comment!
Please enter your name here